病假錢點樣計算？有幾多日？同假期重疊咗點算？

病假（疾病津貼）怎樣計算？我的病假是有薪還是無薪的？一年可以放幾多日病假？以上相信係好多打工仔想問既問題。無論你係真病定「射波」，一齊睇下有咩要注意。但留意返，呢度既病假係講緊自己私人病咗，唔係工傷果類，因為工傷涉及更複雜既野。

１．點先有資格攞有薪病假？

有薪病假並唔係必然既，可謂要配合「天時、地利、人和」，缺一不可。以下既條件要全部符合先可以攞有薪病假。

ａ）首先你要係連續性合約僱員（４１８）

咩係４１８？即係連續４星期，每個星期工作鐘數有１８個小時或以上。如果你係典型返一至五，９至５既工既話，每個月都係咁既話，就已經係連續性僱員，符合咗呢個基本資格。

如果你每個禮拜都做唔夠１８個鐘，咁唔好意思喇，老細唔畀病假錢你都吹佢唔漲既。

咁我本身係符合４１８，但係中途請咗２個幾星期大假去旅行，咁會唔會斷咗而冇咗病假錢？梗係唔會啦，勞工法例考慮到呢啲合理情況，放年假呢啲唔會影響合約既連續性。

ｂ） 病假要連續４日或以上先有錢

法例上黎講，其實要連續放４日病假先會有錢既，但要留意返，有好多特別情況要注意。

ｉ）病假撞咗星期六、日（休息日／例假）

如果你星期六、日係你既休息日（例假）既話，病假紙要包含埋星期六同日先至叫連續，可能有啲１９９９，即係

例如你有需要放病假星期五至下個星期一（４日），如果醫生紙只係批咗星期五同星期一呢兩日病假，咁就唔係連續４日，只有２日，老細畀有薪病假你係人情，唔畀你係道理。相反，若果醫生批咗星期五至下星期一都係病假既話，咁就算係連續４日。

ｉｉ）可唔可以駁病假？

我唔直接答你，我用例子答你。

有個打工仔星期一喉嚨痛，向醫生請咗２日病假，諗住放星期一、二抖下。但係呢個打工仔星期二又發燒，星期二再去睇醫生，然後又攞到星期三同星期四既病假紙。雖然呢兩後病假係唔同病因，但只要日子係連住既，咁就算係連續性病假。

咁你又可能會問，唔同醫生開得唔得既？係得既！你什至可以連續４日都係唔同醫生開畀你。

ｉｉｉ）懷孕僱員既例外情況

如果你細心睇睇勞工處既病假津貼指南，懷孕僱員係有特權既。如果佢地既病假係因為產前、產後或因流產而放既話，單丁１日都會有資格攞有薪疾病津貼。當然醫生紙要註明係「產前檢查」、「產後檢查」或有同等意思的字眼。

ｉｖ）點解有好多公司放１日病假都有錢？

事實上香港既勞工法例冇規定放一至三日病假都要畀錢，可以係無薪，只不過好多私人公司對員工較好，提供比勞工法例更優厚既待遇。但係如果公司提供既待遇係畀勞工法例差既話，咁就有機會犯法，僱員可向僱主追討。

ｃ）能出示適當既醫生紙

勞工法例接受香港既註冊西醫、註冊中醫或者牙醫既證明書。呢個問題不大。當然唔可以塗改張醫生紙自己加日數啦，好明顯犯法。

ｄ）放病假前已累積足夠既有薪病假額

最後一個有薪病假既條件係你响放病假之前要有足夠既ｑｕｏｔａ。如果冇，或者用晒啲ｑｕｏｔａ既話，餘下的病假只會是無薪。

ｉ）如何計算有薪病假額的天數？

符合４１８既員工在第一年，每做滿一個月就可以累積２日有薪病假額，換句話說，做滿第一年之後而又冇放病假既，咁就儲咗２ｘ１２＝２４日病假。

在第二年開始，每做滿一個月就可以累積４日，總共最多可以累積到１２０日。

例如：

第一年：２ｘ１２＝２４日
第二年：４ｘ１２＝４８日（首兩年共累積了２４＋４８＝ ７２日）
第三年：４ｘ１２＝４８日（首三年共累積了７２＋４８＝１２０日）
第四年：４ｘ１２＝４８日（首四年共累積了１２０日，因累積上限係１２０日）

當你放既病假係有薪先會從病假額里面扣，所以先至叫「有薪病假額」。如果你只係放咗普通感冒病假２日，法例黎講係冇錢既，所以就算放咗病假都唔需要扣病假額。

ｉｉ）放緊病假既時候可否繼續儲病假？

有啲打工仔可能大吉利是有大病，要瞓幾個月醫院，咁呢幾個月可否儲到病假額？答案係可以既，因為放病假期間仍然係「受僱期間」。但係留意返呢啲新病假額要等復咗工後先可以再用，唔可以邊儲邊用既。

２．病假與其他日子重疊咗咁點算？ 

好多時打工字都會問如果病假撞咗年假、休息日（例假）、法定假日咁點算？一些睇下啦。

ａ）病假與年假（大假）重疊如何處理？

睇返僱傭條例里面相關條文４１ＡＡ（７）：「年假期間內由於疾病或損傷以致完全喪失工作能力的期間，不得計算為年假的一部分，除非該期間在年假期間開始後方開始。」

呢個條文既意思係：

１）如果本身有個打工仔攞咗８月２７日（一）至３１日（五）呢５日年假，但佢响星期二至四攞咗病假，撞咗日子，咁佢既年假要照扣。因為係年假先開始，然後先開始放病假。

２）如果佢攞咗８月２８日（二）至３１日（五）呢４日年假，但佢攞咗星期一至五既病假，咁星期二至五就唔可以視為年假，唔可以扣，因為係病假開始咗先。

３）如果病假同年假一齊放呢？咁都唔可以扣年假。因為法例講明要年假開始咗先，然後先開始病假，咁先可以扣年假。

所以其實係有法例條文ｓｕｐｐｏｒｔ既，唔使估估下。

ｂ）病假與休息日（例假）重疊如何處理？

呢個要細分兩個性況：

１）根據僱傭條例有關疾病津貼額既３５（２ｂ）條文，如果你既休息日（或有啲人叫「例假」）係無薪既話，當病假重疊休息日既時候，果啲重疊咗既病假就會冇錢。呢個好合理，因為本身你冇病既話，都唔會工作，亦唔會有錢（無薪休息日），所以唔會因為你病咗而無啦啦爆舊錢出黎畀你。

２）如果你既休息日係有錢既，而果日又撞咗病假，理論上黎講係會照計病假錢，即係４／５人工（下一ｐａｒｔ會詳細講點計算）。因為例如你請咗星期五、六、日、一（共４日）病假，而你本身放星期六、日例假有錢，咁名義黎講呢４日都係病假，得４／５病假人工。我知道係有啲奇怪，因為你本身冇放病假既話，星期六、日都會係ｆｕｌｌ　ｐａｙ，但現在請咗病假後得返４／５。但係你諗返，如果你堅持星期六、日既名義係休息日（例假）既話，咁你就冇連續４日病假，冇咗星期五同星期一呢兩日既４／５病假錢了。呢個係有少少法律上既灰色地帶。站在員工立場去睇，老細畀少咗，打工仔可能會唔開心，明明本身例假係有ｆｕｌｌ　ｐａｙ，但攞咗病假就得返４／５。咁老細們願意照畀ｆｕｌｌ　ｐａｙ當然係最好啦。其實果１／５又唔係差好多。咁樣做可以減低未來爭拗既機會。

以上呢兩個情況僱主都唔需要補返例假，若果病假同例假重疊咗。

ｃ）病假與法定假日（勞工假）重疊該如何處理？

如果你既病假咁啱撞咗法定假日，而你放果日既法定假日本身係有錢既話，咁就可以有返ｆｕｌｌ　ｐａｙ人工，但病假額會照扣。因為就算病假疊咗勞工假，果日都係病假黎既，但法例上呢個情況可以特別處理，畀返全額人工。

我點知法定假日有冇人工？勞工法例上黎講只要你符合４１８條件做夠３個月，咁緊接呢３個月之後既法定假期就一定係有薪。

３．病假錢（疾病津貼）點樣計算？

每一日既病假錢＝病假首天前１２個的每日平均工資　ｘ　４／５

例如有個打工仔响２０１８年８月２０至２３日，星期一至四攞咗病假紙放病假，

咁佢既疾病津貼　＝　２０１７年８月１日至２０１８年７月３１日既平均每日工資　ｘ　４／５　ｘ　４日，

但係留意返，如果你之前全部日子都係ｆｕｌｌ　ｐａｉｄ，咁就簡單，就咁將呢個期間既總工資／３６５就等於每日平均工資。但係如果中途有啲冇薪休息日，攞唔足ｆｕｌｌ　ｐａｉｄ既日子例如病假果啲，全部都要扣返晒出黎唔計（錢同日子都要扣出黎），因為驚拉低咗個平均數。另一個情況係若果個員工放病假之前根本做唔夠一年，咁就可以拉平均，拉到去第一日返工果日就得，將ｆｕｌｌ　ｐａｉｄ日子既總工資／總日數。

希望幫到大家，打工仔可以粗略估算下公司有冇畀少咗。如果真係畀少咗既話，同咗老細講咗好多次又唔應機，咁就可以考慮下去勞工處既勞資關係科開個ｆｉｌｅ了，到時勞工處職員會約你同老細上去傾返，睇下會唔會解決到呢個問題。勞工處呢個服務係唔使錢既。

有問題既話歡迎留這畀我，我會盡量幫下大家。