遣散費點樣計算？我有資格攞嗎？做咗好耐畀人炒咗，有咩要注意？

「如何計算遣散費？我有資格攞遣散費嗎？有幾多錢？」相信係好多香港打工仔畀人炒咗果陣最擔心既問題。肯畀既老細有好多，但亦都有好多「度縮」既老細絞盡腦汁去逃避、唔畀遺散費我地呢啲「老ｓｅａｆｏｏｄ」。今次就教教你點樣用《香港僱傭條例》ｋｏ佢地。

１．點先有資格攞遣散費？

講乜都係假，如果自己根本冇資格拿遣散費，根本連「入閘」資格都冇，好老實講就算揾葉ｘ鄧打官司都攞唔到遣散費既，莫講話計算。首先，我地要符合晒以下呢啲條件：

ａ）連續性合約滿２年

咩係連續性合約？呢個名好似會令人有啲不必要既睱想。簡單黎講，如果你份工作係「ｆｕｌｌ　ｔｉｍｅ」，即係星期一至五、９至６呢啲，就會係「連續性」。「連續性」即係坊間既人所講既「４１８」 - 連續 4 個禮拜工作滿１８個小時或以上。

例如，如果你一星期會返４５個鐘，即係超過咗１８個鐘啦，但係咁仲未夠，要連續返夠４個星期或以上，而呢個情況滿２年，咁就符合咗攞遣散費既其中一個資格，可以繼續睇落去。

係，冇錯，如果你份工做咗２年，而ｋｅｅｐ住每個星期返１８個鐘，都符合呢個「２年連續性合約」呢個條件。但係邊度有呢啲筍工？我真係未見過。

咁度縮既老細會點樣逃避呢筆錢呢？

有啲時候你會發現某啲僱主特登唔畀你連續返４個禮拜超過１８個鐘。例如叫你頭３個星期可以任返，但第４個星期要返少過１８個鐘，咁樣你做夠２０年都冇資格攞遣散費。呢個情況係私人公司同政府部門都會發生！！咁你就會知道呢啲僱主係因為唔想畀呢筆遣散費同其他打工仔權益先會咁ｓｅｔ。如果接受唔到就要另謀高就。

ｂ） 因為裁員／合約到期／停工而被炒

另外要符合以下其中一個炒魷原因先有資格攞遣散費。其實都有啲煩，僱主有好大空間可以走數，不過唔緊要，我地慢慢逐個睇下。

ｉ）因為裁員被解僱

根據勞工處既遣散費指南，裁員係指因為成間公司要執笠、執分店、或因為僱主覺得冇需要咁多人做嘢而炒人。如果係咁既話，咁你就有得攞遣散費喇！

ｉｉ）因為合約到期（老細唔續約）

或者，我做緊一份全職符合４１８既ｃｏｎｔｒａｃｔ工，合約要逐年簽既，例如老師。如果你做夠２年，而老細（校長）因為要縮減人手而唔同你續約，咁都有得同你計遣散費，唔使擔心。

但係，如果老細响合約到期前１個星期或以上已經同你講繼續請你，肯同你簽，但自己拒絶唔要呢個ｏｆｆｅｒ，而又冇合理理由既話，咁就冇資格攞呢筆錢了。

ｉｉｉ）因為被停工

最近成日都冇工返，係咪算係畀老闆炒咗？

呢個情況係比較少見，但都講下。如果連續４星期之內，都開工不足，返工既日子唔夠一半，或連續２６星期內返工既日子唔夠１／３，而呢啲冇工開既日子都係冇錢收既，咁都有停工既意思。成個ｃｏｎｃｅｐｔ係員工畀老細停工，唔係正式炒咗，都有機會攞遣散費。但法例上既意思唔係完全停晒，只要唔夠１／２或１／３開工日數（好似上面咁），都算係停工。

２． 香港打工仔如何計算遣散費？

我唔直接答你，我用例子答你。

ａ）月薪員工

如果你係最正常一個月出一次糧的打工仔的話，可以用以下呢條公式去計算遣散費：

最後一個月的工資　ｘ　２／３　ｘ　服務年資（年）

例如我有＄１５０００月薪，而又做咗啱啱好３年，咁你就會有：

１５０００　ｘ　２／３　ｘ　３年　＝　＄３００００遣散費。都幾和味！

但若果我係ｓａｌｅｓ，個個月都出唔同糧，而我最後一個月又得好少錢，咁點算？

勞工法例都有諗過呢一點，所以工資唔穩定既僱員都可以選最後１２個月既平均工資去計遣散費。拉返睇下１２個月平均多啲定最後一個月多啲，係我地打工仔可以選的。

但係留意返遣散費係有最高上限的！！

如果你最後一個月工資係超過＄２２５００，例如我一個月揾＄５００００，條公式都係會只係：

２２５００　ｘ　２／３　ｘ　３年 　＝　＄４５０００

除咗月薪上限，遣散費的總數也規定了是不多於＄３９０，０００

ｂ）日薪員工

如果你係逐日出糧既話，例如地盤之猛＊， 咁你就可以選最後３０個工作日里面選面選１８個最高日薪的出來計算，但係呢１８日既人工加埋係以＄１５０００為上限。

例如我選咗１８日人工係＄１００００，咁遣散費條計算公式就會係

＄１００００　ｘ　２／３　ｘ　年資（單位為年）

如果呢１８日人工係＄４５０００，咁就會係

＄１５０００　ｘ　２／３ ｘ　年資（單位為年），因為條例定咗呢個上限係＄１５０００

ｃ）如何計算遣散費年資？

大家都會留意到遣散費有幾多係關你既年資事，如果年資唔係整數咁點計？例如我返咗３年零６０日，咁點算？

好簡單，我地可以按比例計返，即係

年資　＝　３年　＋　６０／３６５　＝　３.１６４年

３．僱主走數咁點算？如何追討遣散費？

老細同打工仔都要注意下，老細最遲要响合約終止後７日之內要畀返打工仔遣散費，如果僱主冇合理理由而走數，最高可以被罰＄５００００。

如果我同僱主講咗好多次，暗示同明示方法都用咗，佢都係唔畀咁點算？

可能你會覺得追討遣散費可能要揾律師又盛，又要洗好多錢，我又唔識法律嘢。其實如果老細真係拖住你條數，你係可以去勞工處既勞資關係科享用佢地既調停服務，免費既。

打工仔可以去勞資關係科開ｆｉｌｅ，然後佢地就會安排老細（或其代表）同你開返一個調停會議，傾下點樣可以解決呢個走數問題。咁如果調停服務都冇咩進展既話，視乎金額大唔大同埋你自己既意願，咁可能會搞上法庭。

４．咩係遣散費對沖？

新聞成日聽到人話要求取消對沖，究竟強積金對沖同遣散費有咩關係？正如剛才的例子，遣散費可能動輒幾萬蚊，但其實呢筆錢係可以响僱主幫你供果啲強積金果度扣返出黎既！

例如你做咗３年嘢，僱主幫你供咗＄２００００強積金，而計算到你既遣散費係＄４５０００，咁僱主其實只係畀多＄２５０００你，有＄２００００係佢响強積金果度「對沖」返出黎。所以我地打工仔先至咁想取消呢個對沖。

５．遺散費使唔使報稅？打工仔注意

我攞咗咁大筆遣散費，究竟使唔使報稅？根據政府有關薪俸稅既資料，遣散費係唔需要報稅既！好爽！

但係如果你攞到果筆錢，係超出咗香港僱傭條例既規定，咁果部分既錢就唔係法例上的「遣散費」，係需要報稅既。可能有啲１９９９，我用例子解釋下，例如：

我月薪＄１２０００，做咗啱啱好３年比人裁走咗，係４１８工，咁你响法例下便會有

＄１２０００　ｘ　２／３　ｘ　３年　＝　＄２４０００

但如果老細畀咗＄４００００作為遺散費，其中＄２４０００係法例下的遣散費，這部分不用報稅，但多咗出黎既＄１６０００就要報稅了！

希望幫到大家！如果有問題歡迎留言畀我。